نامياري اسلامي عالم مفتي تقي عثماني ڪرپٽو ڪرنسي ذريعي سامان خريد ڪرڻ کي ناجائز قرار ڏيندي چيو آهي ته هيل تائين ماهرن جي تحقيق موجب ڪرپٽو ڪرنسي شريعت جي نظر ۾ دولت جي حيثيت نٿي رکي.
هي فتويٰ دارالافتاءُ، جامعه دارالعلوم ڪراچي طرفان 24 ذوالحج 1447هه (10 جون 2026ع) تي جاري ڪئي وئي هئي. مفتي تقي عثماني، جيڪو وفاقي شرعي عدالت جو اڳوڻو جج پڻ رهي چڪو آهي، تنھن ان فتويٰ تي پنجن ٻين نامياري عالمن سان گڏ صحيحون ڪيون آهن.
ڪرپٽو ڪرنسي ذريعي ڪتاب خريد ڪرڻ بابت هڪ سوال جي جواب ۾ فتويٰ ۾ چيو ويو آهي ته:
"ڪرپٽو ڪرنسي ذريعي لاڳاپيل ڪتاب خريد ڪرڻ توهان لاءِ جائز ناهي.”
فتويٰ موجب، ماهرن جي موجوده تحقيق ۽ راءِ مطابق ڪرپٽو ڪرنسي کي شريعت جي لحاظ کان مال يا دولت نٿو سمجهيو وڃي، بلڪه اها صرف هڪ اڪائونٽ ۾ فرضي انگن جي رڪارڊنگ آهي، ڀلي اها يو ايس ڊي ٽي (USDT) هجي يا ٻيا ڪرپٽو ٽوڪن.
فتويٰ ۾ چيو ويو آهي ته جڏهن ڪرپٽو ڪرنسي کي مال تسليم نٿو ڪيو وڃي، ته اهڙي ادائگي ذريعي خريد ڪندڙ شرعي لحاظ کان انهن ڪتابن جو مالڪ نٿو بڻجي.
انهيءَ ڪري نه رڳو انهن ڪتابن جو استعمال جائز ناهي، پر انهن کي ڪنهن ٻئي کي وڪڻڻ به درست ناهي. فتويٰ موجب خريد ڪندڙ تي لازم آهي ته اهي ڪتاب ان شخص کي واپس ڪري، جنهن کان هن خريد ڪيا هئا.
فتويٰ ۾ هن راءِ جي حمايت ۾ فقهي ڪتابن جا مختلف حوالا پڻ ڏنا ويا آهن.
ڪرپٽو ڪرنسي ذريعي خريد ڪيل آن لائن تعليمي ڪورس بابت ساڳئي نوعيت جي سوال جي جواب ۾ پڻ چيو ويو آهي ته:
"ڪرپٽو ڪرنسي ذريعي تعليمي ڪورس حاصل ڪرڻ صحيح ناهي، ڇاڪاڻ ته اهو شرعي اصولن جي خلاف طريقي سان حاصل ڪيو ويو آهي.”
فتويٰ موجب، اهڙي ڪورس مان نه پاڻ فائدو وٺڻ جائز آهي ۽ نه ئي ڪنهن ٻئي کي ان تائين رسائي ڏيڻ.
ڇاڪاڻ ته ڪورس ڊجيٽل شڪل ۾ هوندو آهي ۽ وڪرو ٿيڻ کان پوءِ به وڪرو ڪندڙ وٽ موجود رهندو آهي، تنهن ڪري خريد ڪندڙ تي لازم آهي ته پنهنجي ڪمپيوٽر، موبائيل ۽ ٻين ڊوائيسز تان ان ڪورس سان لاڳاپيل سمورو مواد مڪمل طور ڊليٽ ڪري ڇڏي.
ٽي ايس ايل مانيٽرنگ ڊيسڪ
