سنڌ جي ضلعي نوابشاھہ ۾ قائم قائد عوام يونيورسٽي آف انجنيئرنگ، سائنس اينڊ ٽيڪنالاجي جي اليڪٽريڪل انجنيئرنگ ڊپارٽمينٽ 28 اپريل تي پلگ ان جي نالي سان مشھور پنھنجو اٺون ساليانو پروجيڪٽ ۽ پوسٽر مقابلو 2026 منعقد ڪيو.
مقابلي واري تقريب IEEEP لوڪل سينٽر نوابشاهه پاران منعقد ڪئي وئي جنهن ۾ سڄي علائقي مان شاگردن، تعليمي ماهرن ۽ پيشه ور ماڻهن جو هڪ وڏو انگ شريڪ ٿيو.
مختلف يونيورسٽين ۽ تعليمي شعبن جي شاگردن ڪيترن ئي STEM تي ٻڌل ڪيٽيگريز ۾ سرگرم حصو ورتو جن ۾ ميگا پروجيڪٽس، مني پروجيڪٽس، ۽ ٽيڪنيڪل پوسٽر مقابلا شامل آهن.
هن تقريب نوجوان انجنيئرن لاءِ جديد ٽيڪنالاجيءَ جي چئلينجن کي منهن ڏيڻ لاءِ جديد خيالن ۽ عملي حل پيش ڪرڻ لاءِ هڪ متحرڪ پليٽ فارم طور ڪم ڪيو.
تقريب ۾ QUEST جي وائيس چانسلر پروفيسر ڊاڪٽر سليم رضا سمون مهمان خاص طور تي شرڪت ڪئي. گڏوگڏ پروفيسر ڊاڪٽر ڪشن چند مڪوانا، ڊين ۽ سينئر فيڪلٽي ميمبر شامل هئا جن ۾ پروفيسر عبدالفتاح چانڊيو (ڊين، فيڪلٽي آف اليڪٽريڪل اينڊ اليڪٽرانڪس انجنيئرنگ)، پروفيسر عبدالستار جمالي (ڊين، ٽيڪنالاجي)، پروفيسر ڊاڪٽر محمد ابراهيم چنا، پروفيسر ڊاڪٽر محمد رمضان لوهر، پروفيسر ڊاڪٽر انتظار حسين سڌو ۽ پروفيسر ڊاڪٽر دادن خان ڀنگوار ۽ ٻين يونيورسٽين جي فيڪلٽي ميمبرن بہ تقريب ۾ شرڪت ڪئي.
پراجيڪٽس ۾ شريڪ شاگردن جو جائزو ماهرن جي ھڪ پينل ورتو ۽ شاندار پارجيڪٽس پيش ڪرڻ ٿي تي کين انعام ۽ تمغا ڏئي سندن ڪم کي مڃتا ڏني وئي ايئن شاگردن جي شاندارمحنت، جدت، ۽ تخليقي صلاحيتن کي اتساھيو ويو.
وائيس چانسلر پروفيسر ڊاڪٽر سليم رضا سمون پروگرام جو انتظام ڪندڙن ۽ شرڪت ڪندڙن جي تعريف ڪئي ۽ چيو ته اهڙا موقعا شاگردن ۾ تحقيقي ڪلچر، جدت ۽ عملي سکيا کي ھٿي ڏيڻ لاءِ ضروري آهن. انجنيئرنگ جي تعليم ۾ حقيقي دنيا جي مسئلن کي حل ڪرڻ ۽ مستقبل جي ٽيڪنالاجي جي چئلينجن کي منھن ڏيڻ لاءِ شاگردن کي تيار ڪرڻ گهرجي.
تقريب جي اڳواڻي چيف آرگنائيزر پروفيسر ڊاڪٽر عبدالستار ساند ڪئي جيڪو اليڪٽريڪل انجنيئرنگ ڊپارٽمينٽ جي چيئرمين ۽ چيئر IEEEP لوڪل سينٽر نوابشاهه جي حيثيت سان ڪم ڪري ٿو.
پنهنجي تقرير ۾ هن ان ڳالهه تي روشني وڌي ته پلگ ان نوجوان انجنيئرن جي فني پرورش، سھڪار کي ھٿي وٺرائڻ، ۽ پائيدار ترقي جي مقصد سان مطابقت رکندڙ جديد حل ڳولھڻ جي حوالي سان هڪ فليگ شپ پليٽ فارم ۾ تبديل ٿي چڪو آهي. هن تعليمي اڏام، صنعت جي شموليت، ۽ ٽيڪنالاجي جي ترقي لاءِ يونيورسٽيءَ جي عزم جو اظھار ڪيو.
پرو وائيس چانسلر پروفيسر ڊاڪٽر ڪشن چند مڪوانا چيو تہ اهڙيون تعليمي سرگرميون تعليم ۽ ان جي عملي استعمال جي وچ ۾ فرق کي ختم ڪرڻ ۾ اهم ڪردار ادا ڪن ٿيون، ۽ شاگردن کي تنقيدي ۽ جدت سان سوچڻ لاءِ ھمٿائن ٿيون. اٺين پلگن 2026 جو اختتام کٽندڙ ٽيمن ۾ انعام ورھائڻ سان ٿيو.
ٽي ايس ايل مانيٽرنگ ڊيسڪ
