انڊس موٽر ڪمپني پنهنجي گاڏين جي پارٽس کي ملڪ ۾ ٺاھڻ جي عمل کي اڳتي وڌائڻ لاءِ 1 ارب رپين جي اضافي سيڙپڪاري جو اعلان ڪيو آهي جنهن سان پارٽس ملڪ اندر ٺاھڻ جي رٿا ھيٺ ڪمپني جي ڪل سيڙپڪاري 5.1 ارب رپين تائين پهچي وئي آهي.
پاڪستان اسٽاڪ ايڪسچينج ۾ جمع معلوماتي نوٽيس مطابق ڪمپني جي بورڊ آف ڊائريڪٽرز 24 اپريل 2026 تي پنهنجي اجلاس ۾ تازي سيڙپڪاري جي منظوري ڏني. اهو قدم آگسٽ 2024 ۾ اعلان ڪيل 4.1 ارب رپين جي اڳوڻي سيڙپڪاري جو حصو آهي جيڪو هن وقت جاري آهي ۽ ڪئلينڊر سال 2026 جي آخر تائين مڪمل ٿيڻ جي اميد آهي.
ڪمپني چيو ته اضافي سيڙپڪاري مقامي طور تي تيار ڪيل گاڏين ۾ لوڪلائيزيشن کي ڏاڪي وار وڌائڻ، امپورٽ ٿيل پارٽس تي انحصار گهٽائڻ ۽ گهريلو صنعتي ترقي کي ھٿي وٺرائڻ سندن وسيع حڪمت عمليءَ جو حصو آهي.
انڊس موٽر چيو ته فنڊ پلانٽ ۽ مشينري، مولڊز، ڊائيز، سامان ۽ آٽوميٽو پارٽس ۽ پارٽس جي مقامي پيداوار تي خرچ ڪيو ويندو ۽ ٻيا لاڳاپيل خرچ بہ ڪيا ويندا. نئين اعلان ڪيل سيڙپڪاري 2027 جي ڪئلينڊر سال جي آخر تائين مڪمل ٿيڻ جي اميد آهي.
ڪمپني چيو ته لوڪلائيزيشن مهم جو مقصد پرڏيهي مٽاسٽا جي ٻاهر ويندڙ وهڪري کي گهٽائڻ، پاڪستان جي آٽوميٽو وينڊر انڊسٽري کي ھٿي وٺرائڻ، روزگار جا موقعا پيدا ڪرڻ ۽ قومي معيشت ۾ پنھنجو حصو وجھڻ آهي. اعلان کي پاڪستان جي انجنيئرنگ ۽ آٽو پارٽس ٺاهڻ واري شعبي لاءِ هڪ ھاڪاري ترقيءَ طور ڏٺو پيو وڃي جيڪو ڪمپني پاران مقامي قدر ۾ اضافي کي مضبوط ڪرڻ ۽ صنعتي ترقي کي هٿي ڏيڻ لاءِ جاري ڪوششن کي ظاهر ڪري ٿو. – ٽي ايس ايل رپورٽ
