جيئي سنڌ قومي محاذ طرفان پارٽي چيئرمين صنعان قريشي تي ڪيس داخل ڪرڻ خلاف 21 جنوري تي احتجاج جو سڏ ڏنو ويو آهي. ملير جي علائقي گلشن حديد مان جاري ڪيل بيان ۾ جسقم چيئرمين چيو ته جي ايم سيد جي سالگرهه ملهائڻ تي ڪيس داخل ٿيڻ سندن لاءِ اعزاز آهي. صنعان قريشي چيو ته سندس خلاف ڪيس داخل ٿيندا رهيا آهن، بحريا ٽائون واقعي جي 33 ڪوڙن ڪيسن کي منهن ڏنو. سندس چوڻ هو ته هو عدم تشدد جا حامي آهن، دنيا جي ڪابه طاقت کين سنڌ جي وجود جي مالڪي تان هٿ نٿي کڻائي سگهي. جسقم ميڊيا ڪو آرڊينيٽر ديدار شاهه جو چوڻ آهي ته جي ايم سيد جي سالگرهه ملهائڻ تي جسقم چيئرمين صنعان قريشي تي ڪيس داخل ٿيڻ خلاف 21 جنوري تي سڄي سنڌ ۾ احتجاجي مظاهرا ڪيا ويندا.
