مھراڻ يونيورسٽي آف انجيئرنگ اينڊ ٽيڪنالاجي ڄامشورو جي پروفيسر ايميريٽس ڊاڪٽر ڀواني شنڪر چوڌريءَ کي رومانِيا جي يونيورسٽي آف اوراڊيا ايسوسيئيٽ مدعو پروفيسر جو اعزازي خطاب ڏنوآھي.
يونيورسٽي پاران جاري ڪيل ڊپلوما موجب ڊاڪٽر ڀواني شنڪر چوڌري کي تدريس، تحقيق ۽ عالمي علمي سهڪار جي ميدان ۾ ٽن ڏهاڪن کان وڌيڪ خدمتن جي مڃتا طور هي اعزاز ڏنو ويو۔ خاص طور معلوماتي ۽ رابطي واري ٽيڪنالاجي، ايمبيڊڊ نظام، مصنوعي ذهانت، شين جي انٽرنيٽ، ڪمپيوٽر انجنيئرنگ ۽ ذهين ٽيڪنالاجيز جي شعبن ۾ سندس اهم علمي ۽ تحقيقي خدمتن کي ساراهيو ويو۔
ڊپلوما ۾ پاڪستان ۽ رومانيا جي يونيورسٽين وچ ۾ علمي ۽ تحقيقي سهڪار کي هٿي وٺرائڻ لاءِ سندس ڪردار جي پڻ واکاڻ ڪئي وئي۔
هي اعزاز اوراڊيا يونيورسٽي جي ريڪٽر ۽ سينيٽ جي صدر پاران ڊاڪٽرل مطالعي واري ڪائونسل جي سفارش تي عطا ڪيو ويو۔ ڊپلوما 30 سيپٽمبر 2026ع تي جاري ڪيو ويو۔
علمي ۽ انجنيئرنگ حلقن ڊاڪٽر ڀواني شنڪر چوڌري کي عالمي اعزاز حاصل ڪرڻ تي واڌايون ڏنيون ۽ ان کي پاڪستان، خاص طور سنڌ جي انجنيئرنگ ۽ تعليمي برادري لاءِ فخر جوڳو قرار ڏنو آهي۔ ڊاڪٽر ڀواني شنڪر چوڌري انجنيئرنگ تعليم، جديد تحقيق، جدت ۽ عالمي علمي رابطن جي واڌاري لاءِ پنهنجي خدمتن سبب سڃاتو وڃي ٿو۔ — ٽي ايس ايل
